Poesia di Tonino CAU tenores di Neoneli… Rossella

Come da desiderio espresso da Tonino Cau, tenores di Neoneli, nel suo messaggio sul noto social network Facebook, diffondiamo la sua poesia composta in occasione della liberazione avvenuta di Rossella Urru, speriamo di fare cosa gradita…evviva Rossela Urru liberaaaaaaaaaaaaaaaaaa

A modo mio plaudo alla sospirata liberazione di Rossella Urru, dedicando a lei qualche umile riflessione in limba. Diffondete pure, se ritenete i miei versi meritevoli di andare in tanti luoghi. (Tonino CAU)

ROSSELLA

In d’una terra misera affligida,
ue donzi die est un’iscumissa,
ue b’at una, un’idea fissa,
sa lota pro campare, pro sa vida,
bides sa zente a runda, istasida,
a sa natura ingrata sutamissa,
paren caràsos, ti faghene pena,
aizu aizu tragan sa carena.

Bestidos sun de tapulos fiagosos
e biven in barracas e in tanas,
agguantana infernales sas caldanas
in sos desertos feos, pruinosos,
bides sos pitzinneddos muconosos,
a brente ufrada chi parene ranas,
non patin sidi nen famene ebbia,
ma pius de una mortale maladia.

Ai cussos logos de miseria e dolu
chi a s’inferru suni simbizantes,
acudini non pagos tribbagliantes,
pro dare ai cussos miseros cunsolu,
tragan meighinas, mandigu e non solu,
cunfortan betzos e limusinantes,
faghen iscola, difunden cultura
e a sos suferentes dana cura.

Sun’anghelos de chelu, chi a s’anneu
chircana su remediu e s’acunortu,
solu a su bene anzenu dan’importu
non pensan: “cussu logu cantu est feu”,
istrinan calchi iscurta de recreu,
a chie patit gana mesu mortu,
a chie est de sa musca divoradu,
de callentura e pestas frazigadu.

Seberan sa miseria e sa malesa,
in logu de una vida sana e bella,
lassan famiglia, lassan parentella,
pro una missione de alta nobbilesa,
in prima ria b’est puru Rossella
sa cara, desemplada simughesa,
pro fagher bene ebbia est andada,
ma in santu Aine l’ana secuestrada.

L’an sequestrada a traitoria
omines sena sensu isnaturados,
ingratos, che bandidos mascherados,
posta che l’ana in dura prejonia,
cheren dinare, su dinare ebbia,
non sun patriotas disinteressados,
bae e chirca in cale tana, in cale furru,
tenian ligada a Rossella Urru.

Ma oe mancu male, est cussa die
tant’isetada, meses de turmentu,
oe est arrivadu su mamentu,
de fagher festa, festa umpare a tie,
sa idda intrea como est rie rie,
bessida da un’orridu ispaventu,
no est pius s’ora de sa tribbulia
como est torrada a totus s’allerghia.

Ciao Rossella, e bene torrada,
faghimus festa pro custos congruos,
gosadi in paghe sos afetos tuos,
s’isula intrea fit tota ispantada,
como seguru ca l’as alligrada
a Simugheo, e a sos fizos suos,
fin totus in anneu e in oriolu,
preighende donzi die, in su dolu.

Ma oe est festa, sa note agabbada,
sa timoria como ch’est a palas,
sun’in s’ammentu cussas oras malas,
chi as passadu tue imprejonada,
no ischimus comente t’an tratada,
ma oe bola, abberi sas alas,
ses libbera de nou, che un’ae,
ismentigadi totu, bola e bae.

Sos paesanos ti sun’isetende,
sa piata est pronta, neta e fiorida,
sa zente est a muntones riunida,
sonetes e organitos sun sonende,
sa danza e s’arrosciada sun ballende,
coita, ahiò, a fagher s’arrivida,
ses che un’isposa, sa nodida prama
totus de t’abbratzare tenen brama.

Tocat de fagher festa tot’umpare,
pro ismentigare donzi suferentzia,
fit tropu grae sa tua ausentzia,
e tropu t’amus devidu isetare,
dae cras sa vida torradi a leare,
sa pius diciosa e dechida esistentzia,
olvida, si lu podes, tant’ispreu,
chi lasset logu a gosu e recreu.

Tue Rossella ses un’stendardu,
ses una rosa tantu singulare,
torres inue cheres a curare,
sos bisonzosos cun coro gagliardu,
tue chi ses s’orgogliu ‘e donzi sardu,
sos caros tuos potas abbratzare,
ismentiga pressosa cust’ispreu,
e gosadi sa vida in su recreu.
Gosa riende festas e sarau,
benetorrada dae Toninu Cau

Tonino Cau, tenores di Neoneli, 18 luglio 2012

(790)

One Response to "Poesia di Tonino CAU tenores di Neoneli… Rossella"

  1. Mario  19 luglio 2012 at 11:34

    bellissima poesia (F)

You must be logged in to post a comment Login